- 319 -

1382. April 30. Liegnitz.

Der Stadtrichter und die Schöppen gewährleisten der Elisabeth, Frau des verstorbenen Ticzen Kursener eine Zinsverschreibung.

Ich Bernhard Gor, richter czu Legnicz von der stat wegen, vnd wir scheppen do selbist Jorge Brockotindorff, Nicolaus Crodin, Niclos Tammendorff, Niclos Kolbil, Petir Hezeler, Hannos Quentyn vnd Pawil Schonebyr bekennen, daz vor vns yn gehegetem dinge di hernochbeschrebenn lewte bekanten, daz si schuldig weren Elisabethen di Ticzen Kurseneris eliche howsfrauwe gewest ist vnd iren geerben rechtis erbczinses vff iren garten vird erben, di si haben vor dem Haynawischen tore gelegen, iczlicher alz vil, alz her noch steet beschreben, vff sante Mertyns tag alle iar czu geben, Nickel Heger eyne halbe mark, Nickel Soraw yn syner vormundschafft von Maneth Scheferynne, syner swester kinder wegen eyn schok vnd vir grosschin, Hentschil Hoveman sechczehen scot grosschin, Mertyn Wytan eyn schok vnd eynen grosschin, Hannos Bertold eyn halb schok grosschin, Tyme sechs grosschin, Michel Monstirberg czwenczigistehalbis scot grosschin, Nitsche Pfyfer eyne halbe mark grosschin, Petir Heger vierczehin scot grosschin. Do noch bat Elisabeth di vorgenante mit Nicolao Crodin dem obgenanten czu vragen, ab ir di vorgenanten lewte den egenanten czins vff den vorbeschrebenn tag nicht geben, ab man ir icht pfandis douor helffen sulde adir was recht were. Do vragete der richter di lewte, ob si icht dowedir wolden. Do sprachen si, daz si nicht do wedir wolden. Do gab orteil vnd recht, wenne si ir den czins vff den vorbeschrebenen tag nicht geben, daz man ir pfandis douor helffen sulde von rechtis wegen. Dez czu bekentnisse haben wir desin briff gegeben dorobir vorsigilt mit vnsern ingesigeln. Das ist gescheen yn deme dinge an sante Walpurgen obande. Noch gotis geburd towsund dryhundirt jore yn dem czweyundachtczegisten jore.

O. d. St. L. No. 155 mit beiden Siegeln an Pergamentstreifen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866